പതിമൂന്നുകാരിയെ സഹപാഠികള് പീഡിപ്പിച്ച സംഭവം; ബാലാവകാശ കമ്മീഷന് സ്വമേധയാ കേസെടുത്തു
പത്തനംതിട്ട: പത്തനംതിട്ടയില് പതിമൂന്നുകാരിയെ സഹപാഠികള് ചേര്ന്ന് പീഡിപ്പിച്ച സംഭവത്തില് സംസ്ഥാന ബാലാവകാശ കമ്മീഷന് കേസെടുത്തു. ബാലാവകാശ കമ്മീഷന് ചെയര്പേഴ്സണ് കെ വി മനോജ് കുമാറാണ് സ്വമേധയാ കേസെടുത്തത്. മാധ്യമ വാര്ത്തകളുടെ അടിസ്ഥാനത്തിലാണ് കമ്മീഷന് കേസെടുത്തത്. സ്കൂളിലെ കൗണ്സിലിംഗിനിടെയാണ് വിദ്യാര്ത്ഥി പീഡനവിവരം വെളിപ്പെടുത്തിയത്. സ്കൂളിന് സമീപത്തും മറ്റൊരു പെണ്കുട്ടിയുടെ വീട്ടില് വെച്ചും പീഡിപ്പിച്ചതായാണ് വിദ്യാര്ത്ഥിനി പറയുന്നത്സംഭവത്തില് ആറുപേര്ക്കെതിരെ പൊലീസ് കേസെടുത്തു. അതില് ഒരാള് പെണ്കുട്ടിയാണ്. അഞ്ച് പേര് തന്നെ പീഡിപ്പിച്ചുവെന്നാണ് പെണ്കുട്ടി മൊഴി നല്കിയത്. ആറാമത്തെയാളുടെ വീട്ടില് വെച്ചും പീഡനം നടന്നുവെന്നാണ് മൊഴി. കൗണ്സിലിംഗിന് പിന്നാലെ സ്കൂള് അധികൃതര് പൊലീസിനെയും ശിശുക്ഷേമ സമിതിയെയും സംഭവം അറിയിക്കുകയായിരുന്നു. പെണ്കുട്ടിയുടെ സംരക്ഷണം സിഡബ്യൂസി ഏറ്റെടുത്തു. പ്രതികളുടെ മൊഴി പൊലീസ് രേഖപ്പെടുത്തും.
