ഒരു ദിവസത്തിൽ രണ്ട് കുതിപ്പ്; സ്വര്ണവിലയില് വീണ്ടും വര്ധന: വീണ്ടും 90,000ത്തിന് മുകളിലേക്കോ
സംസ്ഥാനത്തെ സ്വര്ണവില ഇന്ന് വീണ്ടും വര്ധിച്ചു. ഉച്ചയ്ക്കു ശേഷം സ്വര്ണം പവന് 480 രൂപ വര്ധിച്ച് 89,880 രൂപയിലെത്തി. ഗ്രാമിന് 60 രൂപ വര്ധിച്ച് 11,235 രൂപയായി. ഇന്ന് രാവിലെ സ്വര്ണം ഗ്രാമിന് 40 രൂപ വര്ധിച്ച് 11,175 രൂപയും, പവന് 320 രൂപ വര്ധിച്ച് 89,400 രൂപയുമായിരുന്നു. ഇന്നലെ സ്വര്ണം ഗ്രാമിന് 90 രൂപ കുറഞ്ഞ് 11,135 രൂപയും, പവന് 720 രൂപ കുറഞ്ഞ് 89,080 രൂപയുമായിരുന്നു. ഈ മാസത്തെ ഏറ്റവും കുറഞ്ഞ നിരക്കാണ് ഇന്നലെ രേഖപ്പെടുത്തിയത്.ഒക്ടോബര് മാസത്തിലെ സ്വര്ണവില നിരക്ക് പവന് ഒരു ലക്ഷത്തിലേക്ക് എത്തിക്കുമെന്ന പ്രതീതി ഉണ്ടാക്കിയതിനു ശേഷം കഴിഞ്ഞ ഏതാനും ദിവസങ്ങളായി സ്വര്ണവില 90,000ത്തിനും 89,000ത്തിനും ഇടയില് വന്ന് നില്ക്കുന്നതാണ് കാണാന് സാധിച്ചത്.2025ല് ഇന്ത്യയുടെ സ്വര്ണ ഡിമാന്ഡ് 600 മുതല് 700 ടണ് വരെയാകുമെന്ന് വേള്ഡ് ഗോള്ഡ് കൗണ്സില് പ്രതീക്ഷിക്കുന്നത്. ആഗോളതലത്തില് ഈ വര്ഷത്തിന്റെ മൂന്നാം പാദത്തില് സ്വര്ണ്ണത്തിന്റെ ആവശ്യം റെക്കോര്ഡ് കണക്കായ 1,313 ടണ്ണിലെത്തിയിട്ടുണ്ട്. ഭൗമരാഷ്ട്രീയവുമായി ബന്ധപ്പെട്ട അനിശ്ചിതത്വങ്ങള്, വ്യാപാര സംഘര്ഷങ്ങള്, ഡോളര് കരുതല് ശേഖരം സ്വര്ണ്ണമാക്കി മാറ്റുന്നത് തുടങ്ങിയവ വരും മാസങ്ങളില് വിലയുടെയും ഡിമാന്ഡിന്റെയും ആക്കം കൂട്ടുമെന്നാണ് വിലയിരുത്തപ്പെടുന്നത്.
