തിരുവനന്തപുരം: കെപിസിസി ജനറൽ സെക്രട്ടറി ബിആർഎം ഷഫീറിന്റെ ഭാര്യ ആർ. എസ് ഷാനി രാജിവെച്ചു. സീ-മാറ്റിലെ ബന്ധു നിയമന വിവാദത്തെ തുടർന്നാണ് രാജി. വേണ്ടത്ര യോഗ്യതയില്ലാതെയായിരുന്നു നിയമനം. അപേക്ഷ ക്ഷണിക്കാതെ, ഇൻറർവ്യൂ നടത്താതെയായിരുന്നു നിയമനം. സീ-മാറ്റിലെ റിസർച്ച് ഓഫീസർ പദവിയിൽ നിന്നാണ് എസ് ഷാനി രാജി വെച്ചത്. കരാർ അടിസ്ഥാനത്തിലുള്ള ജോലിക്ക് 40000 രൂപയാണ് ശമ്പളം. ഒഴിവ് വന്ന സമയത്ത് ബയോഡേറ്റ ലഭിച്ചപ്പോൾ യോഗ്യതയുടെ അടിസ്ഥാനത്തിൽ നിയമിച്ചതാണെന്ന് സീമാറ്റ് വിശദീകരിച്ചിരുന്നത്.സർക്കാർ നിയമനങ്ങളിൽ രക്തബന്ധത്തിനും ബന്ധുക്കൾക്കും പ്രസക്തിയില്ല എന്ന് പ്രഖ്യാപിച്ച ബിആർ എം ഷെഫീറാണ് ഭാര്യയുടെ നിയമനമാണ് വിവാദത്തിലായത്. പൊതുവിദ്യാഭ്യാസ വകുപ്പിന് കീഴിലുള്ള സ്റ്റേറ്റ് ഇൻസ്റ്റിറ്റ്യൂട്ട് ഓഫ് എജ്യുക്കേഷണൽ മാനേജ്മെന്റ് ആൻഡ് ട്രെയിനിങ് സ്ഥാപനത്തിലാണ് ഷാനി ഷെഫീറിന് നിയമനം ലഭിച്ചത്. നിയമനം വിവാദമായതോടെ ഡിവൈഎഫ്ഐ സീമാറ്റ് ഡയറക്ടറെ ഉപരോധിച്ചിരുന്നു. നിയമനം റദ്ദാക്കിയില്ലെങ്കിൽ ശക്തമായ പ്രതിഷേധവുമായി മുന്നോട്ടുപോകുമെന്ന് ഡിവൈഎഫ്ഐ മുന്നറിയിപ്പ് നൽകിയിരുന്നുഒഴിവ് വന്നപ്പോൾ അപേക്ഷിച്ചെന്നും ആരുടെയും അവസരം തട്ടിയെടുത്തിട്ടില്ലെന്നുമായിരുന്നു ബിആർഎം ഷഫീർ വിശദീകരിച്ചിരുന്നത്. ബന്ധു നിയമനം മുൻ സർക്കാരിനെതിരെ പ്രചാരണ വിഷയമാക്കിയ യുഡിഎഫ് അധികാരത്തിലെത്തിയപ്പോൾ ബന്ധുക്കൾക്ക് നിയമനം നൽകുന്നുവെന്ന ആരോപണം ഇതിന് പിന്നാലെയുണ്ടായി.
